Փաստաբանների պալատի նախագահ Արա Զոհրաբյանը ֆեյսբուքյան իր էջում հայտնել է. «Ինչպես հիշում եք, 53 փաստաբան հանցագործության մասին հաղորդում էին ներկայացրել կապված ՀՀ նախագահ Արմեն Սարգսյանի երկքաղաքացիության փաստը թաքցնելու հետ:
Հատուկ քննչական ծառայությունը մերժել էր քրեական գործ հարուցելը, որի դեմ փաստաբաններով բողոք էինք ներկայացրել:
Պետք է տեղեկացնեմ, որ ՀՀ գլխավոր դատախազությունը բողոքի հիման վրա ՎԵՐԱՑՐԵԼ Է ՀՔԾ որոշումը և ՀԱՐՈՒՑԵԼ Է քրեական գործ ՀՀ քրեական օրենսգրքի 325 հոդվածի 1-ին մասի (փաստաթղթեր կեղծելը, իրացնելը կամ օգտագործելը) հատկանիշներով:
Դատախազության որոշման մեջ նշվել է՝ «Վերոգրյալ մեկնաբանությունների լույսի ներքո հարկ է նշել նաև, որ իրավաչափ են բողոքաբերների այն ենթադրությունները, որ Արմեն Սարգսյանը Միացյալ Թագավորության քաղաքացիությունը դադարեցրել է ոչ թե 2011 թվականին, այլ դրանից հետո և հակառակի վերաբերյալ սույն նյութերով օբյեկտիվ այլ փաստական տվյալներ ձեռք չեն բերվել, որպիսի պայմաններում առկա են ողջամիտ կասկածներ տրամադրված տեղեկատվության (դիմումի)՝ իրականությանը չհամապատասխանելու վերաբերյալ, այսինքն՝ ՀՀ քրեական օրենսգրքի 325-րդ հոդվածի 1-ին մասով քրեական գործ հարուցելու բավարար հիմքեր»:
«ՉԻ». Հրանտ Բագրատյանի աչքը լույս: Լրիվ իր սրտով էր: Մեռավ էդ մարդը պահանջելով, որ ստուգեն Արմեն Սարգսյանի անցյալն ու ներկան:
Ապրի Արա Զոհրաբյանը. անսաց Հրանտ Բագրատյանի հորդորներին: Նշանակում է՝ արդարության ջատագով է, լսում է ժողովրդի ձայնը:
Դե որ այդպես ժողովրդի ձայն լսող է Արա Զոհրաբյանը, թող մեզ էլ լսի, մի բան էլ մենք ասենք, հանցագործության մասին հաղորդում ներկայացնի:
Ուրեմն, Արա Զոհրաբյան ջան, մի մարդ կա, անունը չենք տալիս, էս մարդը ոչ Հայաստանում էր ապրել, ոչ հայերեն խոսել գիտեր, ոչ՝ հայերեն կարդալ, ոչ էլ՝ հայերեն մտածել: Մի օր էս մարդը ԺԵԿ-ից մի հատ թղթի կտոր է հանում, թե բա վերջին 10 տարին ես Հայաստանում եմ բնակվել: Սուտ. ոչ բնակվել էր, ոչ էլ՝ Հայաստանում տուն է ունեցել: Ավելին, հերիք չէ, այլ երկրում էր ապրում, նույնիսկ այդ երկրի ղեկավարն էր: Այսինքն՝ ԺԵԿ-ի տեղեկանքը կեղծ էր:
Բայց այդ մարդը՝ այդ կեղծ տեղեկանքով Հայաստանում զավթեց իշխանությունը:
Բա հիմա սա հանցագործության մասին հաղորդում տալու մատերիալ չի՞, հը՞, պրն Զոհրաբյան: Էդ «Զարթոնք» է, ինչ է, այդ կուսակցությունը մի կողմ դիր, մեր ասածներով զբաղվիր: Այնքան հետաքրքիր բաներ կպարզվեն, դու էլ մեր փաստաբանական կանտորայում Հայկ Ալումյանին կստվերես:
Մանավանդ, որ Արա Զոհրաբյանի այդ նորաստեղծ կուսակցությունը ազգային-քրիստոնեական է համարվում, իսկ այն մարդը, ում մասին պատմեցինք, ոչ միայն հավատացյալ չէ, այլ նաև ահավոր խրտնում է Ավետարանից: Դե, քեզ տեսնենք, մեր ազգային-սկզբունքային փաստաբան ապի: