Ձկնապուր որտեղ ասես, որ չեն պատրաստում՝ Ֆրանսիայում և Իտալիայում, Իսպանիայում ու Հունաստանում: Ծովային երկար սահման ունեցող Ալժիրն էլ բացառություն չէ: Ալժիրյան ապուրի յուրահատկությունն այն է, որ մատուցելուց առաջ այն լավ հարում են՝ վերածելով խիտ ու բուրումնավետ կրեմի:
Բաղադրիչները
4 բաժնի համար
- 700 գ ձուկ
- 3 բաժակ ձկան արգանակ կամ ջուր
- 2 կարտոֆիլ
- 3 ճյուղ նեխուր
- 1 միջին չափի գլուխ սոխ
- 2 պճեղ սխտոր
- 400 գ կտրտած լոլիկ՝ սեփական հյութի մեջ
- 3 ճ.գ. ձիթապտղի ձեթ
- 1 թ.գ. աղացած կարմիր պղպեղ
- մի պտղունց քրքումի թելիկ
- աղ, աղացած սև պղպեղ
- մաղադանոս՝ մատուցելու համար
Պատրաստման եղանակը
- Սոխը մաքրեք ու մանր կտրատեք: Մաքրեք ու մանր կտրատեք կարտոֆիլն ու նեխուրը: Սխտորը դանակի կոթով ճզմեք, ապա մաքրեք ու մանրացրեք:
- Հաստ հատակով կաթսայի մեջ տաքացրեք ձեթը, լցրեք սոխն ու միջին ուժգնության կրակի վրա 5 րոպե տապակեք:
- Սոխին ավելացրեք սխտորը, նեխուրը և լոլիկները՝ իր հյութի հետ մեկտեղ: Երբեմն-երբեմն խառնելով՝ 10 րոպե շոգեխաշեք:
- Ավելացրեք քրքումի թելիկները, աղացած կարմիր պղպեղը, կարտոֆիլը, եռացրած արգանակը կամ ջուրը, ևս 10 րոպե պատրաստեք:
- Ձկան փափկամիսը ոչ մեծ կտորներով կտրատեք: Կտրտած ձուկն ավելացրեք ապուրին, կափարիչի տակ 7-10 րոպե եփեք:
- Ապուրը հարեք բլենդերով, մինչև միատարր զանգված ստանալը, աղ ու պղպեղ արեք, մատուցեք՝ վրան լցնելով կտրտած մաղադանոսը:
Խորհուրդ: Եթե ձկան կրեմ-ապուրի գաղափարը ձեր սրտով չէ, պատրաստեք այսպես. ապուրից հանեք ձկան պատրաստի կտորները, բանջարեղենը բլենդերով հարեք, լցրեք ափսեների մեջ՝ դրանց մեջ տեղադրելով ձկան կտորները: