Աֆրիկյան խոհանոցում գազարով աղցանի մի քանի տարբերակ կա՝ ինչպես եփած գազարից, այնպես էլ՝ հում:
Ստորև ներկայացված գազարի աղցանը շատ հայտնի է Ալժիրում և հիանալի համադրվում է համեմունքներով պատրաստված մսով ուտեստների հետ: Պարզապես պետք է հյութալի, քաղցր ու համեղ գազար ընտրել, հակառակ դեպքում աղցանը չի ստացվի:
Բաղադրիչները
4 բաժնի համար
- 500 գ գազար, ցանկալի է՝ մանր
- 3 պճեղ սխտոր
- կես կիտրոնի հյութ
- 3-4 ճյուղ մաղադանոս կամ անանուխ
- 1/2 թ. գ. կայենյան պղպեղ (кайенский перец)
- 1/2-1 թ. գ. զիրայի սերմեր
- մի փոքր շաքարավազ, ցանկալի է՝ շագանակագույն
- ծովի խոշոր աղ
Պատրաստման եղանակը
- Զիրան լցրեք չոր թավայի մեջ, դրեք միջին ուժգնության կրակի վրա, խառնելով՝ 1-2 րոպե բովեք: Երբ համեմունքի բույրը զգաք, վերցրեք կրակից:
- Զիրային ավելացրեք աղն ու կայենյան պղպեղը, տրորեք, վերածեք փոշու:
- Մաքրեք սխտորն ու գազարը: Գազարը բաժանեք չորս մասի, եթե մեծ գազարներ են, ավելի շատ մասերի բաժանեք:
- Կտրտած գազարը սխտորի, շաքարավազի ու մի փոքր աղի հետ լցրեք եռացող ջրի մեջ ու 15 րոպե եփեք:
- Պատրաստի գազարը թողեք քամվի, չորացրեք, տեղադրեք ափսեի մեջ, համեմեք: Եփած սխտորը նույնպես կարող եք կտրտել ու որպես համեմունք օգտագործել:
- Թողեք 15 րոպե հովանա, վրան կիտրոնի հյութ և մանրացրած մաղադանոս կամ անանուխ լցրեք:
Խորհուրդ: Աղցանի տոնական տարբերակի համար կարող եք գազարի հետ միասին հում բազուկ օգտագործել և համեմել նարնջի հյութով ու անանուխով:
«Չորրորդ իշխանություն», թիվ 5, 2021