Թունիսում այս ուտեստի անվանման հետ կապված հետաքրքիր պատմություն կա: Կարկանդակները «Ֆաթիմայի մատներ» անունն են ստացել երիտասարդ աղջկա պատվին, որն իր մատների բարակության ռուլետներ է պատրաստել: Այդ ռուլետները ճաշակելու համար աղջա հոր տունը միշտ երկրի տարբեր ծայրերից եկած հյուրերով է լցված եղել, մինչ այն պահը, երբ հյուրերից մեկը փախցրել է աղջկան և ամուսնացել նրա հետ:
Բաղադրիչները
6-8 բաժնի համար
- 400 գ ֆիլո խմոր
- 500 գ կարտոֆիլ
- 1 միջին չափի գլուխ սոխ
- 1 պճեղ սխտոր
- 2 ճյուղ կանաչ սոխ
- 2 ճյուղ մաղադանոս
- կես կիտրոնի կեղև
- 1 թ.գ. խարիսա համեմունք (տես՝ խորհուրդը)
- ձիթապտղի ձեթ
- աղ
- կարագ՝ տապակին քսելու համար
Պատրաստման եղանակը
- Կարտոֆիլը մաքրեք, քառակուսաձև կտրատեք: Սոխը մաքրեք, կտրատեք:
- Սոխն ու կարտոֆիլը ձիթապտղի ձեթի մեջ միջին ուժգնության կրակի վրա 5 րոպե տապակեք: Ապա 1/2 բաժակ եռացրած ջուր լցրեք, կափարիչը փակեք, թույլ կրակի վրա 20 րոպե շոգեխաշեք:
- Այդ նույն ժամանակ դանակի կոթով ճզմեք, մաքրեք ու մանր կտրատեք սխտորը: Այն ավելացրեք կարտոֆիլին, միասին 5 րոպե շոգեխաշեք, ապա պատառաքաղով տրորեք: Հանեք կրակի վրայից:
- Մանր քերիչով անցկացրեք կիտրոնի կեղևը, կանաչ սոխն ու մաղադանոսը մանր կտրատեք, ավելացրեք կարտոֆիլին, ավելացրեք խարիսան, աղն ու պղպեղը: Թողեք միջուկը հովանա:
- Ֆիլո խմորը 12-15 սմ կողմերով քառակուսաձև կտրատեք, 3-4 քառակուսի մեկը մյուսի վրա դրեք՝ յուրաքանչյուր շերտին ձիթապտղի ձեթ քսելով: Այն խմորը, որով դեռ չեք աշխատում, ինչպես նաև պատրաստի ռուլետները դրեք խոնավ կտորի տակ. ֆիլոն շատ արագ է չորանում:
- Բազմաշերտ քառակուսիների ամեն շերտի վրա 1-2 ճ.գ. միջուկ դրեք, ապա ռուլետի ձևով ոլորեք: Նույնն արեք մյուս քառակուսիների հետ:
- Խորը կաթսայի մեջ միջին ուժգնության կրակի վրա լավ տաքացրեք կարագը: Մաս-մաս տապակեք ռուլետները, մինչև ոսկեգույն երանգ ստանալը: Պատրաստի ռուլետները դրեք անձեռոցիկների վրա, որպեսզի ավելորդ յուղը ներծծվի:
«Ֆաթիմայի մատները» մատուցեք տաք վիճակում:
Խորհուրդ: Խարիսան չիլի պղպեղով, սխտորով, զիրայով և ձիթապտղի ձեթով խիտ, կծու սոուս է: Դուք կարող եք այն տանը պատրաստել. պարզապես պետք է մանրացնեք բաղադրիչներն ու իրար խառնեք, կամ էլ կարող եք այն փոխարինել ոչ այնքան աղի, կծու աջիկայով:
«Ֆաթիմայի մատների» բուսական միջուկը կարող եք փոխարինել մսայինով: Դրա համար անհրաժեշտ է տապակած սոխին ավելացնել 200 գ ոչխարի միս, աղացած զիրա և համեմի սերմ, ապա 300 գ կարտոֆիլ, ինչից հետո ռուլետները շարունակեք պատրաստել՝ ըստ բաղադրատոմսի: