Քաղաքագետ, Երևանի ավագանու ընտրություններին մասնակցող «Մայր Հայաստան» դաշինքի անդամ Ստեփան Դանիելյանը գրել է. «Երբ քարոզարշավից առաջ քննարկում էինք հնարավոր տարբերակները, հիմնական սցենարն այն էր, որ Փաշինյանի համար ընդունելի ընդդիմությունը լինելու է այն թեկնածուն, ում դարձնելու են քննադատության թիրախ, դրանով բարձրացնելով նրա ձայների քանակը:
Ինչն է հետաքրքիր, մենք կանխագուշակում էինք, որ դա լինելու է Հայկ Մարությանը: Նրան դարձնելով հիմնական թիրախ, դարձնելու էին ՔՊ-ի այլընտրանքը: Դա պարզ տեխնոլոգիա է, որը բազմիցս է կիրառվել»:
«ՉԻ». Դե ինչ, կարելի է էն գլխից շնորհավորել ՔՊ-ին ու Տիգրան Ավինյանին: Ընդդիմադիրները նրանց դեմ պայքարելու փոխարեն իրար դեմ են պայքարում: Իրենք իրար դեմ պայքարելու են, Ավինյանը քաղաքապետ դառնա: Բա չշնորհավորե՞նք:
Կամ էլ պայքարում են թիվ 1 ընդդիմադիր ուժի կոչման համար: Հիմա Հայկ Մարությանն էլ կարող է պատասխանել, թե դուք էլ քանի տարի է, ջուր եք լցնում իշխանությունների ջրաղացին, որ ձեր Ռոբերտ Քոչարյանը մերժել է ընդդիմության ուժերը միավորելու առաջարկները, ու այսպես մինչև ընտրությունների վերջը:
Այնտեղ ո՞վ մնաց. Տիգրան Արզաքանցյանն էլ կասի, որ այս երկու ուժերը սպառել են իրենց, կոռումպացված են, եթե, իհարկե, կարողանա «կոռուպցիա» բառը արտաբերել:
Մանե Թանդիլյանն ու Դավիթ Խաժակյանը, իհարկե, իրար հետ հարաբերություններ են դեռ պարզելու՝ ձեռքի հետ հարվածելով Մարությանին ու «Մայր Հայաստանին»: Вангуем:
Իշխանության ուզածն էլ հենց սա է. որ ընդդիմադիր ուժ համարվողներն իրար գզեն: