Մնաց Նաիրի Հունանյանը

ՀՀ ոստիկանության քրեական հետախուզության գլխավոր վարչության նախկին պետ, գեներալ Հովհաննես Թամամյանը Armlur.am-ի հետ զրույցում ասել է. «Անօրինական հրամաններին պետք չի ենթարկվել: Սիրելի ոստիկաններ, դուք գիտեք, որ այսօրվա իշխանավորները հայրենիք չունեն, սրանց հայրենիքը սորոսն է, այդ կույտը գնացող է, մենք իրար հետ պիտի լինենք: Մեր անցած 40 տարիները ոստիկանական համակարգում եղել են շատ բարդ, ցավոտ, որ անկախ մեր կամքից հայտնվել ենք տարբեր քննչական կառույցներում»:

«ՉԻ». Ձեզ բան ենք ասում, միակ մարդը, որն առայժմ զարմանալիորեն չի հայտարարում Նիկոլ Փաշինյանի հեռացման անհրաժեշտության մասին, Նաիրի Հունանյանն է: Արդեն ինչքան գող, ավազակ, բանդիտ, մարդասպան կա, բոլորը մի-մի հատ սրբապատկեր վերցրած, երկրի փրկության և Նոր Հայաստան կերտելու մասին են խոսում: 

Մի օր կդնենք, նորից կներկայացնենք նույն այս Հովիկ Թամամյանի մասին մեր հրապարակումները՝ դեռ 2000-ականներին: Որ կարդաք, նկատի ունենք երիտասարդ սերնդին, ձեզ կթվա, թե սադո-մազոխիստական ինչ-որ ուղեցույց է: Ծեծ, ջարդ, խոշտանգումներ, ծեծելով մարդկանց մահվան դուռը հասցնել... Քվենթին Տարանտինոյի «Հոսթել» ֆիլմի հայկական տարբերակն է: 

Նիկոլը ֆանտաստիկ կերպով հաջողացրեց սրանց բոլորն հարություն տալ: Այս մարդիկ, որոնք պիտի մկան ծակին օխտը թուման տալով ապրեին, էսօր խոսում են օրինականությունից, ոստիկաններին բարոյականության կոչեր են անում: Դրա համար ենք մենք այսքան երախտապարտ Փաշինյանին, որ 2,5 տարում արեց անհնարինը:

«Չորրորդ իշխանություն», թիվ 9, 2021