Ազգային անվտանգության ծառայությունը հունվարի 28-ին ձերբակալել էր «Միացյալ Հայաստան» կուսակցության նախագահ Վահան Բադասյանին։ Վերջինս Եռաբլուրում հայտարարել էր, որ պետք է ազատվել Նիկոլ Փաշինյանից:
«Տարբեր, ընդհուպ՝ մինչև ֆիզիկապես հեռացնելը, դա ենթադրում է, որ թշնամուն պետք է վերացնենք, ընդհուպ՝ զենքի միջոցով: Ես սպառնալիքի կոչեր եմ անում, գիտակցաբար եմ անում, թող ԱԱԾ-ն ինձ ձերբակալի: Թշնամին ենթակա է ոչնչացման, և դա անհատները պետք է անեն, մեկը ես՝ պատրաստ եմ: Մենք պետք է երկիրը մաքրենք թշնամուց, հետո նոր մյուս հարցերը լուծենք»:
168.am-ի հետ զրույցում Վահան Բադասյանի փաստաբան Արայիկ Պապիկյանն ասել է, որ Վահան Բադասյանին հետապնդելը քաղաքական ենթատեքստ ունի։
«Սա քաղաքական հետապնդման ենթատեքստ ունի, թեև ձևի առումով իրավաբանություն է։ Պարոն Բադասյանին մեղադրանք է առաջադրվել Քրեական օրենսգրքի 301-րդ հոդվածով՝ իշխանության զավթում, սահմանադրական կարգը բռնի տապալելուն ուղղված հրապարակային կոչեր, որն ինքը չի ընդունել, այդ մասին նա հայտարարել է՝ չի ընդունում իրեն առաջադրված մեղադրանքը»:
«ՉԻ». Սա մեզ հիշեցրեց «Զգուշացիր ավտոմեքենայից» հայտնի ֆիլմի այն դրվագը, երբ քննիչ Պոդբերյոզովիկովը դատարանում ավտոմեքենաներ առևանգած Դետոչկինի մասին ասում է. «Նա, իհարկե, մեղավոր է, բայց նա՝ մեղավոր չէ»:
Փաստաբանը՝ ըստ էության, հայտարարում է, որ իրավական տեսանկյունից Վահան Բադասյանի ձերբակալությունն ու կալանավորման միջնորդությունը հիմքեր ունեն, բայց նա մեղավոր չէ: Որովհետև մեղավոր չէ: Ճիշտ է, հրապարակավ հայտարարել է երկրի ղեկավարին թեկուզ ֆիզիկապես ոչնչացնելու մասին, բայց մեղավոր չէ: Հետևաբար, սա քաղաքական հետապնդում է:
Իհարկե, փաստաբանի գործն էլ դա է. ամեն ինչ անել, որ պաշտպանյալի նկատմամբ պատիժ չկիրառվի, բայց գոնե այնպես ձևակերպեն, որ մարդու ծիծաղ չառաջանա: Թեպետ, իհարկե, ծիծաղելու համար բոլորովին լավ ժամանակներ չեն:
«Չորրորդ իշխանություն», թիվ 4, 2021