...

Քաղաքական տեղափոխություններ ձմեռային տրանսֆերային պատուհանի ժամանակ

Քաղաքական տեղափոխություններ ձմեռային տրանսֆերային պատուհանի ժամանակ

Եթե քաղաքականության մեջ գործեր ֆուտբոլային տեղափոխությունների պրակտիկան, ապա ձմեռային տրանսֆերային պատուհանի ժամանակ կունենայինք հետևյալ տեղափոխությունները:

1. ԼՀԿ պատգամավոր Անի Սամսոնյանը կտեղափոխվեր Երևանի ավագանու «Լույս» խմբակցություն: Ակնհայտ է՝ նրա խաղային որակները, հմտությունը լավագույնս կդրսևորվեն այդ թիմում: Եթե հաշվի առնենք, որ Անի Խաչատրյանը, Թեհմինա Վարդանյանը և Դավիթ Խաժակյանը գերադասում են նույն խաղաոճը, ինչ Սամսոնյանը, կունենայինք նպատակային համալրում:

2. Հովիկ Աղազարյանը կվերադառնար ՀՅԴ թիմ՝ այնտեղ կարիերան ավարտելու համար:

3. ԲՀԿ-ն կօգտվեր ձմեռային պատուհանից և թիմ կհրավիրեր Զապին: Թիմը ներկայումս ունի ցանկություն և կատարողներ՝ խաղալու քրեական ենթամշակույթի ոճով, բայց կաղում է տեսական գիտելիքներից: Զապը կարող է մի քանի ամսում լուրջ տակտիկական հմտություններ հաղորդել Գևորգ Պետրոսյանին ու Վարդան Ղուկասյանին:

4. Գևորգ Գեորգիսյանը կտեղափոխվեր ՀՀԿ-ի «Անդրանիկ Մարգարյան» մանկապատանեկան թիմ:

5. Սերժ Սարգսյանը կվաճառեր ամբողջ ՀՀԿ-ն, միլիարդների պարտք կաներ և կգներ Նիկոլ Փաշինյանին:

6. Ռոբերտ Քոչարյանը կդիմեր դատարան և կմիջնորդեր, որ անվավեր ճանաչեն իր պայմանագիրը Հայաստանի հետ:

7. ՍԴ-ը գործարք կառաջարկեր Վերաքննիչ դատարանին: Փոխանակել Վահե Գրիգորյանին Սամվել Ռշտունու հետ՝ հավելավճարով:

8. Նիկոլ Փաշինյանը «Իմ Քայլի» առնվազն 20 պատգամավորի հետ կխզեր պայմանագիրը, և նրանք կդառնային ազատ գործակալներ:

9. Հայկ Կոնջորյանին կգներ որևէ իրանական ակումբ և կնստեցներ պահեստայինների նստարանին:

10. Արսեն Թորոսյանը կփակեր բոլոր ակումբները՝ անհայտ ծագման խթանիչներ օգտագործելու պատճառով:
 

ՆՄԱՆԱՏԻՊ ՆՅՈՒԹԵՐ
Դեպի ՎԵՐ