«Եթե երկրորդ նախագահն ասել է, որ ինքը մասնակցելու է ու կրելու է, նշանակում է՝ մասնակցելու է ու կրելու է, ուրիշ բան չեմ կարող ասել»։
Պնդման հեղինակը «Մեկ Հայաստան» կուսակցության ղեկավար Արթուր Ղազինյանն է:
«ՉԻ». Իհարկե, ուրիշ բան չես կարող ասել, բայց ճիշտ կլինի լուծարես մարդ-կուսակցությունդ ու աղանդ ստեղծես: Օրինակ՝ «Ռոբերտի վերջին օրեր» անունով:
Հետո էլ որոշ ընդդիմադիր գործիչներ ժողովրդին են զոմբի անվանում: Հիմա, որ Ղազինյանին անվանեն Քոչարյանի զոմբի, շատ սխալված կլինե՞ն: Միայն զոմբիներն են անվերապահ հավատում որևէ մեկի խոսքին: Եթե ի վիճակի չես կասկածի տակ դնել Քոչարյանի խոսքերը, գոնե մի փոքր ճկունություն ցուցաբերեիր: Ասեիր՝ կապրենք, կտեսնենք, խճանկարը դեռ պարզ չէ, հայտնի չէ, թե ով ում հետ է գնալու ընտրությունների, բարդ քարոզարշավ է սպասվում և այլն: Բայց՝ ոչ: Անվերապահ հավատում ենք, որ եթե ասել է՝ հաղթելու եմ, ուրեմն կհաղթի:
Ի գիտություն Ղազինյանի՝ եթե առաջ Քոչարյանը խաղում էր միայն 4 տուզով, իսկ երբեմն նաև 5-6-ով, ապա դրանցից մնացել է միայն մեկը՝ փողը: Այն էլ դեռ խնդիր է, թե այն որքան արդյունավետ է ծախսվելու, որովհետև կան բազմաթիվ ղազինյաններ, որոնք պարզապես փող կաշխատեն՝ դիմացը ոչինչ չապահովելով: