ԵԿՄ նախագահ Սասուն Միքայելյանը կառույցի Արաբկիրի մասնաճյուղի ղեկավար է նշանակել «Պահմտոցի» հաղորդաշարի հեղինակ ու ռեժիսոր Սարգիս Միքայելյանին:
«ՉԻ». ԵԿՄ «Արաբկիրի» ջոկատը փառահեղ մարտական ճանապարհ է անցել: Ջոկատը արցախյան ազատամարտի ընթացքում մասնակցել է բազմաթիվ մարտերի՝ Հադրութում, Քարվաճառում, Մարտակերտում, եղել ամենաթեժ կետերում, զոհեր տվել, հերոսներ ունեցել:
Ու հանկարծ նման կառույցի ղեկավար են նշանակում մեկին, որին ջոկատի տղաներն ընդհանրապես չեն ճանաչում: ԵԿՄ-ն հեղինակազրկելու ավելի կարճ ճանապարհ հնարավոր չէ պատկերացնել:
Լավ, կարող է անծանոթ մարդ լինել, բայց Սասուն Միքայելյանը գոնե իմանար, թե ով է այդ Սարգիս Միքայելյանը, միայն վերջին 2-3 տարում քանի անգամ է սկանդալային պատմությունների մեջ հայտնվել:
Բավական է հիշել, որ 2019թ. սեպտեմբերի 30-ին Սարգիս Միքայելյանը Երևանում մեքենայով մի կնոջ էր վրաերթի ենթարկել, ուրիշ մարդու էր ուղարկել ոստիկանություն, որ մեղքն իր վրա վերցնի:
Իսկ դերասան Վահագն Սիմոնյանի («Պոնչոյի») հետ արդեն երկու տարի ձգվող կոնֆլիկտի մասին ամբողջ Հայաստանը գիտի:
Քանի ուշ չէ, Սասուն Միքայելյանին խորհուրդ կտանք փոխել որոշումը: «Արաբկիր» ջոկատը փորձադաշտ չէ: