«Ուսումնասիրելով մեղադրանքը՝ գալիս ենք հետևյալ եզրակացության. եթե Քոչարյանի նկատմամբ հարուցված քրեական գործը ջուր է, ապա Սերժ Սարգսյանի նկատմամբ հարուցված քրեական գործը օդ է։ Սերժ Սարգսյանի դեմ հարուցված քրեական գործը արագացնում է հականիկոլական համախմբումը։ Այստեղ պետք է ասենք՝ շնորհակալություն քեզ՝ Փաշինյան Նիկոլ»,- ասել է Աշոտյանը:
«ՉԻ». Վաղը կլրանա մեկ տարին, ինչ Ռոբերտ Քոչարյանը կալանավորված է: Գործը ջուր է, բայց փաստաբաններն ամեն ինչ անում են, որ բուն դատավարությունը չսկսվի: Այսինքն, ըստ Էլեկտրիկ Երևանի գլխավոր հերոսի տրամաբանության, փաստաբանները չեն ցանկանում, որ հասարակությունը նույնպես հասկանա, թե ինչ կարգի անհեթեթ մեղադրանքներ են ներկայացրել Քոչարյանին: Մինչդեռ տրամաբանությունը հուշում էր, որ առաջին շահագրգռվածը իրենք պետք է լինեն:
Փաստացի Աշոտյանը անոնսում է նաև Սարգսյանի փաստաբանների վարքագիծը: Նրանք նույնպես դեմ չեն լինի, եթե Սարգսյանը ձերբակալվի, այնուհետև կալանավորվի, ասուլիսներ կտան, կհայտարարեն, որ գործը օդ է, բայց ամեն գնով կխոչընդոտեն, որ բուն դատավարությունը սկսվի:
Ինչ վերաբերվում է հականիկոլական ուժերի համախմբմանը: Այստեղ նույնպես կա ակամա խոստովանություն: Մեկ տարի է Քոչարյանը կալանավորված է, բայց փաստորեն ՀՀԿ-ն չի միացել հականիկոլական առանցքին, անտարբեր է եղել կուսակցության ղեկավարի վաղեմի զինակցի ճակատագրի հանդեպ: Եվ միայն, երբ ուղտը չոքեց նաև իրենց դռան առջև, իրենք որոշեցին միանալ հականիկոլական առանցքին: Ինչ ինչ, բայց Քոչարյանը ունի շատ լավ հիշողություն և այսպիսի խոստովանությունները անհետևանք չեն մնա, երբ մի գեղեցիկ օր Սարգսյանը մտնի այնտեղ, որտեղ ինքն է այժմ գտնվում:
Հ.Գ. Աշոտյանը նաև օդ որակեց իր և վարորդի՝ բյուջեից յուրացումներ կատարելու մասով հայտնի գործը, բայց հետո խելոք տարավ և վճարեց 9 միլիոն դրամը: Երևի վճարեց, որ վարորդը Սերգո Կարապետյանի պես չսկսի գրել ու գրել: