Ֆրանսիայի դեսպանատան դիմաց բողոքի ակցիա իրականացնող Հադրութի բնակիչների հետ հանդիպման ժամանակ Հայաստանում Ֆրանսիայի դեսպան Ջոնաթան Լաքոտն ասել է. «Լարված իրավիճակ է, մենք գիտենք, որ Հադրութի ժողովուրդը ամենատանջված ժողովուրդներից է: Գիտենք, որ ՀՀ-ում իրավիճակը շատ բարդ է, շատ են հարցերը համաձայնագրի հետ կապված, նաև շատ հարցեր մենք ունենք, որովհետև չենք ստորագրել համաձայնագիրը։ Մեր առաջնահերթությունը այս հարցում տուժած մարդկանց աջակցելն է: Այսօր նախագահ Մակրոնը հանդիպելու է ՀՀ ներկայացուցիչների հետ, նախագահ Մակրոնը ասել է, որ պետք է ներկայացվի նաև Հայաստանի շահը»:
«ՉԻ». Գիտեք, չէ՞, թե ինչու ենք Ֆրանսիայի դեսպանի խոսքը ներկայացնում: Որովհետև ներքաղաքական վիճակն այնպիսին է, որ արձագանքելու կամ մեկնաբանելու բան չկա: Մենակ այն գիտենք, որ Գագիկ Ծառուկյանը, Գառնիկ Իսագուլյանը, Գեղամ Մանուկյանը, Դավիթ Համբարձումյանը, Արա Սահակյանը, Արթուր Վանեցյանը, Էդուարդ Շարմազանովը, Արթուր Ղազինյանը, Իշխան Սաղաթելյանը և էլի ուրիշներ ձերբակալվել են:
Ամերիկա հայտնաբերած չենք լինի, եթե ասենք, որ քաղաքական ճգնաժամի մեջ ենք: Ընդհանրապես «մեջ ենք» բառակապակցության հետ ուրիշ բառ են օգտագործում, բայց դե ճգնաժամն էլ է արտացոլում այսօրվա իրավիճակը:
Սթափության կոչ ենք անում, բայց չգիտենք, թե ում: Զսպվածություն է պետք, բայց էլի անհասցե է թվում: Հիմա մենք պատկերացնում ենք, թե ինչպիսին են եղել 1990-ականների Վրաստանն ու Ադրբեջանը:
Իսկ Հադրութի բնակիչների համար մարդու սիրտը մղկտում է: Ախր Հադրութը նույնիսկ 1990-ականների ամենածանր տարիներին թշնամու համար անառիկ է եղել:
«Չորրորդ իշխանություն», թիվ 35, 2020