Խորհրդարանում «Լուսավոր Հայաստան» խմբակցության ղեկավար Էդմոն Մարուքյանի ելույթի ժամանակ վիճաբանություն էր սկսվել «Իմ քայլը» խմբակցության պատգամավոր, ԵԿՄ նախագահ Սասուն Միքայելյանի հետ, որից հետո մոտեցող Մարուքյանին հարվածել, այնուհետև հրմշտոց և ծեծկռտուք էր սկսվել:
Ինչպես «Մենք ենք, մեր սարերի» Իշխանը կասեր. «Թո՜ւ, ճիշտ եմ ասում, թո՛ւ»:
Սա այն դեպքն է, երբ չգիտես էլ՝ ինչը մեկնաբանես, քանի որ ծեծկռտուքի կադրերը համայն աշխարհով մեկ տարածվեցին:
Մի բան կարող ենք հաստատ ասել. Սասուն Միքայելյանը և իր խմբակցական ընկերները պետք է հիշեն, որ իրենք 2 տարի է, իշխանություն են, և այժմ նրանք խորհրդարանում օրենսդրական գործունեությամբ պետք է զբաղվեն, այլևս ընդդիմություն չեն, փողոցային պայքարի փուլը 2 տարի առաջ ավարտվել է:
Սրանք ոնց որ հատուկ նստեն, մտածեն, թե ոնց անեն, որ հնարավորինս արագ հեղինակազրկվեն: Ամենացավալին այն է, որ չկա այն հեղինակությունը, որ նույնիսկ մի հատ թարս նայեր, բոլորը սսկվեին տեղները: Իհարկե, Սասուն Միքայելյանի դեպքում դա մի քիչ դժվար է, ի վերջո, արցախյան պատերազմի և քաղաքական հալածանքների բովով անցած մարդ է, բայց իր այսպիսի վարքագծով հենց իր կենսագրության վրա է սև բիծ գցում:
Հա, ինչքան ուզում եք ասեք. մարուքյանենք սադրել են: Եթե կարողանում են սադրել, ձեզ հունից հանել, ուրեմն, հալալ է այդ մարդկանց: Ընդդիմության գործառույթներից մեկն էլ դա է. սադրել, հունից հանել: Բայց դուք էլ մի սադրվեք, հունից դուրս մի եկեք: Կռիվ եք ուզում, վայր դրեք մանդատները, գնացեք «Մարտեր՝ առանց կանոնների» շոուներին մասնակցեք, մանավանդ, որ այնտեղ լավ էլ փող են տալիս: Զոռով ձեր ընդդիմախոսներին խոսեցնել եք տալիս:
Ձեր քթի տակից հանցագործները փախչում են, դատական ու իրավապահ մարմինները դուրս են գալիս վերահսկողությունից, մարդասպաններին դատարաններից ազատ են արձակում, փոխանակ դրանով զբաղվեք, դա ձեզ մտահոգի, ընկել եք «կլասիկ» պատգամավորի հետևից:
Չեն հասկանում, որ ամեն մի նման միջադեպով փոս են փորում, ու մի օր ընկնելու են այդ փոսը ու էլ չեն կարողանալու դուրս գալ: