ՀՀ արդարադատության նախկին նախարար Արփինե Հովհաննիսյանը՝ անդրադառնալով խորհրդարանի կողմից 2010 թվականին ընդունված Վարչատարածքային բաժանման մասին օրենքին, ըստ որի, Սոթքի հանքի մի մասը հայտնվել է Հայաստանի սահմաններից դուրս, հայտարարել է. «Այդ օրենքը չի կարող պետական սահմանի համար հիմք հանդիսանալ»:
«ՉԻ». Բա որ ասում ենք՝ ադրբեջանցիների ֆայմի գործակիցը զրո է, չէիք հավատում: Գալիս են, ասում են՝ Սոթքի հանքի էս ու էս մասը մերն է: Հարցնում ենք՝ ինչի՞: Ասում են՝ հեսա, նայեք, 2010 թվին Սերժ Սարգսյանի խորհրդարանը՝ հանրապետականով, բհկականով, դաշնակներով, ՀՀ վարչատարածքային բաժանման մասին օրենք է ընդունել, ըստ որի՝ Սոթքի հանքի մի մասը մերն է:
Բացատրում ենք, որ այ յոլդաշ ջան, էդ օրենքը հիմք չի, էդ ուղղակի հավայի օրենք է, հենց-ընենց ընդունված է, ադրբեջանցիների գլուխը չի մտնում: Ասում են՝ չէ, մեր համար հիմք է: Ընդհանրապես անֆայմ են:
Մեռանք բացատրելով, որ ձեր համար հիմք պետք է հանդիսանան Սևրի պայմանագիրը, Ծովից ծով Հայաստանի քարտեզը, Զարուհի Փոստանջյանի ստատուսները, Ռոբերտ Քոչարյանի ինքնակենսագրականը, Արփինե Հովհաննիսյանի պարզաբանումները, ԵՊՀ պատմության ֆակուլտետի դեկան Էդիկ Մինասյանի դասագրքերը... արա´, չեն հասկանում: Իրենց ռետինե խողովակի տեղ են դրել: Սենց կրակ ու ալավ կլինե՞ն, որ սրանք են: