Երեկ արդարադատության փոխնախարար Սրբուհի Գալյանը նշանակվեց ՀՀ գլխավոր դատախազի՝ ապօրինի ծագում ունեցող գույքի բռնագանձմանն ուղղված գործառույթների ոլորտը համակարգող տեղակալի պաշտոնում: Առաջիկա օրերին կնշանակվեն ստորաբաժանման մյուս դատախազները, և օրենքը կսկսի աշխատել:
Մինչ նախկիններն աղմկում են, թե օրենքի կիրառումը կբերի վատ հետևանքների, պատճառ կդառնա կապիտալի արտահոսքի և այլն, մեզ ուրիշ հանգամանք է հետաքրքրում: Ինչո՞ւ այս կառույցը չստեղծվեց որպես լրիվ անկախ ծառայություն: Ինչո՞ւ այն այնուամենայնիվ պետք է լինի մի կառույցի ենթակայության տակ, որն առանձնապես չի հաջողել կոռուպցիայի դեմ պայքարում:
Նմանատիպ կառույցներ կան Արևելյան Եվրոպայի մի շարք երկրներում, և նրանք բոլորն անկախ մարմիններ են: Հատկապես տպավորիչ է ռումինական փորձը, իսկ Ռումինիայի ազգային հակակոռուպցիոն դիրեկցիայի ղեկավար Լաուրա Կյովեշիի անունը թնդում է ամբողջ Եվրոպայով մեկ: Իր պաշտոնավարման ընթացքում Կյովեշիի ղեկավարած ծառայությունը մինչև մեղադրական ակտի է հասցրել մի քանի տասնյակ բարձրաստիճան կոռուպցիոներների գործեր: Դատապարտվել են վարչապետներ, նախարարներ, 40 պատգամավորներ և սենատորներ:
Սրբուհի Գալյանը հաստատ ունի գործունեության ոչ պակաս դաշտ, քան Լաուրա Կյովեշին: Հայաստանի կոռուպցիոներներն իրենց մասշտաբներով, ագահությամբ և դիզած ապօրինի հարստությամբ չեն զիջում ռումինացի կոլեգաներին:
Կյովեշիին իր երկրում բազմիցս են քննադատել լիազորությունները չարաշահելու, հեռախոսները ապօրինի լսելու և այլնի մեջ: Ի վերջո, նրա հակառակորդները կարողացան հասնել նրա պաշտոնանկությանը: Սակայն տիկին Կյովեշին հասել էր աշխատանքային այնպիսի հաջողությունների, որ պաշտոնանկությունից հետո ընտրվեց Եվրամիության գլխավոր դատախազ:
Գործող իշխանությունները տապալել են դատաիրավական ոլորտի բարեփոխումները, դատարանները վերածվել են հակահեղափոխության օջախների, կոռուպցիոներները քմծիծաղով են վերաբերվում իրենց նկատմամբ հարուցված քրեական գործերին:
Ապօրինի գույքի բռնագանձումը թերևս վերջին հույսն է, որ կարելի է հետ ստանալ թալանված հարստության գոնե մի մասը: Պետք էր ստեղծել լրիվ անկախ մարմին և նրանից պահանջել կոնկրետ արդյունքներ: Դատախազության նկատմամբ չկա հանրային մեծ վստահություն, պետք չէր նոր կառույցը դնել դատախազության ենթակայության տակ:
Ամեն անգամ, երբ նոր կառույցը փորձի բռնագանձել որևէ կոռուպցիոների ապօրինի գույքը, տեղին կամ անտեղի շահարկվելու է գլխավոր դատախազի գործոնը և հատկապես նրա հարստության հանգամանքը:
Ամեն դեպքում, հույս ունենանք, որ Սրբուհի Գալյանը կցուցաբերի նույնքան սկզբունքայնություն, որքան ցուցաբերել է նրա ռումինացի գործընկերը: Ի պաշտոնե նա դառնում է ռևանշիստների և կոռուպցիոներների թիվ մեկ ախոյանը, իսկապես արդյունավետ աշխատելու դեպքում նա կենթարկվի աննախադեպ մեդիա գրոհների և անձնական թիրախավորման:
Արիս Վաղարշակյան