ԱԺ փոխնախագահ Ալեն Սիմոնյանը՝ անդրադառնալով այն հարցին, թե արդյոք իրենց նախկին աջակիցները չէի՞ն կարող պատերազմի ավարտից հետո հասկանալ, որ սխալվել են իրենց ընտրելով ու իրենց հետ լինելով, պատասխանել է. «Կարող է մտածեն, որ սխալվել են, կարող է և հիասթափվեն, բայց դա չի նշանակում, որ գնալու են, ամենավատ տարբերակը ընտրեն: Չի կարող մարդ, որը հեղափոխության արժեքները կիսել է, հիմա հիասթափվի և գնա ու Քոչարյան կամ Սերժ Սարգսյան կամ մեկ այլ նախկին իշխանության թևի տակ»:
«ՉԻ». Ուշադրություն դարձրեք. ԱԺ փոխնախագահն ասում է՝ գուցե մենք վատն ենք, բայց Քոչարյանը կամ Սերժ Սարգսյանն ավելի վատն են: Այսինքն՝ մեզ փորձում են ընտրության առջև կանգնեցնել. վատի ու ավելի վատի միջև: Իրենց նպատակն էլ հենց դա է: Իրենց ձեռնտու է, որ Քոչարյանը լինի այլընտրանքը: Գործը ահագին հեշտանում է:
Իրենք այս ընտրություններում միայն մի կարգախոս են ունենալու. ժողովուրդ, եթե մեզ չընտրեք, ապա Քոչարյանը կամ Սերժ Սարգսյանն են գալու։ Ուրիշ բան չեն ասելու: Չեն ասելու, թե ինչի համար է պետք իրենց ընտրել, ինչ լավ գործերի համար, որ արել են վերջին երկու տարում: Որովհետև ասելիք չունեն: Ի՞նչ ասեն. ասեն, որ երկիրը վարի ենք տվել, բայց Քոչարյանը վա՞տ մարդ է: Չնայած՝ կարող է դա էլ ասեն:
«Չորրորդ իշխանություն», թիվ 15, 2021