...

Հեշտ ու համեղ. Աղցան Պանցանելլա

Հեշտ ու համեղ. Աղցան Պանցանելլա

Այս աղցանն ամենայն հավանականությամբ Տոսկանայի քրիստոնյաների շրջանում ծնվել է չոր հացը փափկացնելու և այն բանջարեղենի հետ ուտելու սովորույթից: Սովորաբար գյուղական տներում հացը շաբաթը մեկ էին թխում, իսկ մի քանի օր հետո չոր հացի պաշար էր կուտակվում, որն անհրաժեշտ էր ինչ-որ կերպ սպառել:

Այնպես որ՝ գյուղացիների համար շոգերն ընկնելուն պես այս աղցանը հիմնական ուտելիք էր դառնում: 
Պանցանելլան լավ ծամելու կարիք էլ չկա, այնպես որ այն հաճախ «ծերուկների ուտեստ» են անվանում, չնայած որ այն վայելում է նաև երիտասարդների սերը:

Բաղադրիչները

  • 400 գ չորացրած հաց
  • 3-4 շատ հասած միջին չափի լոլիկ
  • 2 միջին կարմիր քաղցր գլուխ սոխ
  • 1 խոշոր վարունգ
  • փոքր փունջ ռեհան
  • կարմիր գինու քացախ
  • ձիթապտղի ձեթ
  • աղ, աղացած սև պղպեղ

Պատրաստման եղանակը

  1. Հացերը մասնատեք, 5-7 րոպեով դրեք սառը ջրով պնակի մեջ: Հետո քամեք, խոշոր կտորներով կտրատեք: Հացի կտորները տեղադրեք մեծ ափսեի մեջ, որով պետք է մատուցեք աղցանը:
  2. Լոլիկների վրա խաչաձև կտրվածք արեք, 30 վայրկյանով մտցրեք եռացրած ջրի մեջ, հետո՝ սառը ջրի մեջ, կեղևը, սերմերն ու հեղուկը հեռացրեք, միջուկը խորանարդաձև կտրտեք:
  3. Սոխը կտրատեք բարակ օղակների ձևով: Եթե վարունգի կեղևը դառն է, կլպեք, հակառակ դեպքում թողեք կեղևով: Վարունգը կտրատեք բարակ օղակների ձևով: Բոլոր բանջարեղենները լցրեք հացով ափսեի մեջ: Ավելացրեք ռեհանի տերևները, աղ ու պղպեղ արեք, լցրեք ձեթը: Խառնեք:
  4. Աղցանը 10-15 րոպեով տեղադրեք սառնարանում: Մատուցելիս աղցանը համեմեք քացախով ու էլի մի փոքր ձիթապտղի ձեթ ավելացրեք՝ ըստ ճաշակի:

Խորհուրդ: Հացը հատուկ չորացնելու կարիք չկա: Կարող եք օգտագործել երեկվա կամ 2 օրվա հացը:

«Չորրորդ իշխանություն», թիվ 25, 2020

ՆՄԱՆԱՏԻՊ ՆՅՈՒԹԵՐ
Դեպի ՎԵՐ