Սա շատ հին աղանդեր է՝ հայտնի դեռևս 14-րդ դարից: Սովորաբար այս ժելեն այնքան էին եփում, որ այն կարելի էր շատ երկար պահել: Այն քառակուսաձև կտրտում էին ու պահում կավե տարաների մեջ:
Հիմա սերկևիլից ժելեն տարածված է ողջ Իտալիայում, բայց նրա հիմնական արտադրողը շարունակում են համարել Ապուլիան: Մեր ժամանակներում ժելեն լցնում են կաղապարների մեջ, որտեղ այն սառչում է, հետո հանում են կաղապարից և մատուցում փոքրիկ ափսեների մեջ:
Աղանդերն սկսեք պատրաստել մատուցելուց 14 ժամ առաջ:
Բաղադրիչները
4-6 բաժնի համար
- 1 կգ հասած սերկևիլ
- 500-600 գ շաքարավազ
- 1/4 բաժակ ալյուր
- 2 ձվի դեղնուց
- 1 կիտրոնի կեղև
- 300 մլ կաթ
- 50 գ մաքրած նուշ
Պատրաստման եղանակը
- Սերկևիլը մաքրեք կեղևից ու միջուկից, պտղամիսը կտրտեք: Կշռեք սերկևիլը և սերկևիլի կշռի կիսով չափ շաքարավազ ավելացրեք նրա վրա: Խառնեք ու 12 ժամով տեղադրեք սառնարանում:
- Սառնարանից հանեք շաքարապատ սերկևիլը, լցրեք հաստ հատակով կաթսայի մեջ և թույլ կրակի վրա եփեք մինչև այն փափկի՝ մոտ 1 ժամ: Սառեցրեք:
- Մեկ ուրիշ կաթսա վերցրեք, 1/2 բաժակ շաքարավազը խառնեք ալյուրի հետ: Ավելացրեք դեղնուցները և կիտրոնի կտրտած կեղևի կեսը: Խառնելով՝ մաս-մաս ավելացրեք կաթը: Ստացված խառնուրդը 10 րոպե անընդհատ խառնելով եփեք թույլ կրակի վրա: Հովացրեք:
- Նուշը 200 աստիճան ցելսիուս տաքության ջեռոցում խորովեք 5-7 րոպե, բլենդերով մանրացրեք:
- Կիտրոնի կրեմը լցրեք ափսեի մեջ, վրան դրեք եփած սերկևիլը, սերկևիլի վրա ցանեք նուշի փշուրները և կիտրոնի մնացած կեղևները:
Խորհուրդ: Եթե աղանդերը պատրաստելուց հետո սերկևիլի ժելե մնա, տեղադրեք այն ապակե տարայի մեջ և ծածկեք: Այդպես ժելեն սառնարանում կարելի է պահել մինչև 10 օր:
«Չորրորդ իշխանություն», թիվ 8, 2021