Կիպրոսյան սուվլակիան, նույն ինքը՝ խորովածը, պատրաստում են խոզի, իսկ էլ ավելի հաճախ՝ գառան մսից: Որպեսզի այն ստացվի, երկու կարևոր բան է պետք հիշել: Առաջինը՝ փայտիկի վրա պետք է հերթով շարել միսն ու ճարպը. այդպես ճարպը զարմանալի համ ու հյութեղություն կհաղորդի մսին: Երկրորդ՝ սուվլակիան պետք է թեժացրած ածուխի վրա արագ ու հաճախակի թեքելով խորովել, որպեսզի չչորանա:
Բաղադրիչները
4 բաժնի համար
- 500 գ գառան փափկամիս՝ ազդրի հատվածից
- 250 գ գառան ճարպ
- աղ, աղացած սև պղպեղ
Խավարտի համար
- 200 գ բնական յոգուրտ
- 2 հասած, միջին չափի լոլիկ
- 2 միջին չափի վարունգ
- 1 միջին չափի սպիտակ գլուխ սոխ
- 1 կիտրոնի հյութ
- մի քանի ճյուղ մաղադանոս
- աղ, աղացած սև պղպեղ
Պատրաստման եղանակը
- Խորովածի համար նախատեսված փայտիկները 1 ժամով տեղադրեք սառը ջրի մեջ, որպեսզի խորովելուց չայրվեն, իսկ պատրաստի միսը հեշտ դուրս գա:
- Խավարտի համար մաղադանոսի ցողունները հեռացրեք, տերևները շատ մանր կտրատեք: Խառնեք յոգուրդը, մաղադանոսն ու մի փոքր կիտրոնի հյութ, ձեր ճաշակով աղ ու պղպեղ արեք:
- Միսը քառակուսիների ձևով կտրատեք, յուրաքանչյուրը կողմը՝ 2 սմ: Ճարպը նույնպես նույն չափով կտրատեք: Փայտիկի վրա անցկացրեք միսն ու ճարպը հետևյալ հերթականությամբ՝ 4 կտոր միս, 3 կտոր ճարպ:
- Խավարտի համար լոլիկներն ու վարունգները կտրատեք, բարակ ու կիսալուսնաձև կտրատեք սոխը:
- Միսը թեժացրած ածուխի վրա տապակեք մինչև միջուկը բաց շագանակագույն երանգ ստանա, աղ ու պղպեղ արեք, վրան ցողեք մնացած կիտրոնի հյութը:
- Յուրաքանչյուր ափսեի մեջ տեղադրեք փայտիկով միսը, մի քիչ բանջարեղեն ու սոխ: Բանջարեղենի վրա աղ ու պղպեղ արեք: Առանձին մատուցեք յոգուրդի սոուսը:
Խորհուրդ: Այս խորովածը կարելի է պատրաստել մսի հետ ոչ միայն ճարպ, այլև տաքդեղ, լոլիկ ու սոխ շարելով, ինչպես լուսանկարի մեջ է: