Առաջարկում ենք պատրաստել խնձորով ու տանձով իտալական այս կարկանդակը:
Բաղադրիչները
- 2 մեծ տանձ
- 2 միջին չափի քաղցր-թթու խնձոր
- 2/3 բաժակ շաքարավազ
- 1/2 բաժակ կաթ
- 4 ձու
- 4 չոր թխվածքաբլիթ
- 1/3 բաժակ ալյուր ու մի փոքր էլ տապակին ցանելու համար
- 1 փաթեթ կամ 10 գ փխրեցուցիչ
- 1 փոքր բաժակ ռոմ
- մի պտղունց աղացած դարչին
- կարագ տապակին քսելու համար
Պատրաստման եղանակը
- Խնձորն ու տանձը կլպեք, մաքրեք սերմերից, պտղամիսը կտրտեք: Կտրտած միրգը լցրեք պնակի մեջ, վրան լցրեք ռոմը և 1/2 բաժակ շաքարավազը: Պնակը ծածկեք, թողեք 1 ժամ: Թխվածքաբլիթները փշրեք:
- Մեկ այլ պնակի մեջ ձուն հարեք մնացած շաքարավազի հետ, ավելացրեք ալյուրն ու փխրեցուցիչը, փշրած թխվածքաբլիթը, աղացած դարչինն ու կաթը: Խառնեք, մինչև միատարր զանգված ստանաք: Հետո զգուշորեն խառնեք տանձի ու խնձորի հետ:
- Շրջանաձև տապակը պատեք կարագով, վրան ալյուր ցանեք: Ստացված խառնուրդը լցրեք տապակի մեջ: Տապակը 40 րոպեով տեղադրեք 180 աստիճան ցելսիուս տաքության ջեռոցում:
- Երբ կարկանդակը պատրաստ լինի, տեղադրեք այն սկուտեղի վրա: Կարող եք մատուցել ինչպես տաք, այնպես էլ սառը վիճակում:
Խորհուրդ: Այս կարկանդակի համար խնձոր ու տանձ ընտրելիս նախապատվությունը տվեք հասած, բայց պինդ մրգերին: Քանի դեռ խնձորն ու տանձը ռոմի մեջ են, դրանք կարող են մգանալ: Եթե դա ձեզ դուր չի գալիս, կարող եք մինչև ռոմի մեջ մտցնելը կիտրոնի հյութով ցողել մրգերը: Այս դեպքում շաքարի քանակն էլ պետք է ավելացնել 1 ճաշի գդալով: Կարկանդակը պատրաստելիս աշխատեք սեզոնային մրգեր օգտագործել: Խնձորն ու տանձը կարող եք սալորով ու դեղձով փոխարինել: Շատ հետաքրքիր է նաև դդումի և մրգերի համադրությունը:
«Չորրորդ իշխանություն», թիվ 16, 2020