Սարդինյան լեքսիկոնում «ուդիդու» նշանակում է «եփված»: Սա Սարդինիայում հովվի ճաշի տարբերակներից մեկն է: Ռեստորաններում այս ուտեստը պատրաստելիս թարմ հաց են օգտագործում, իսկ ահա հովիվները ստիպված են ինչ-որ կերպ «վերակենդանացնել» արդեն չորացած կտորները: Եվ իհարկե, նրանք ուտեստը պատրաստելիս խոզի ու տավարի միս չեն օգտագործում, այլ այն, ինչ ձեռքի տակ է՝ ոչխարի միս:
Ռեստորանների կողմից մի փոքր վերամշակման ենթարկված այս ուտեստի ստորև ներկայացված տարբերակը բավական համեղ է ստացվում:
Բաղադրիչները
4 բաժնի համար
- 400 գ տավարի փափուկ միս
- 400 գ խոզի փափուկ միս
- 2 միջին չափի գլուխ սոխ
- 4 միջին չափի լոլիկ
- 2 պճեղ սխտոր
- փոքր փունջ ռեհան
- 1 մեծ կտոր հաց
- 4 ճ.գ. ձիթապտղի ձեթ
- աղ, աղացած սև պղպեղ
Տաք աղցանի համար
- 1 միջին գլուխ ծաղկակաղամբ
- 2 մեծ լոլիկ
- 1 միջին չափի գլուխ սոխ
- 40 գ բեկոն
- 4 ճ.գ. ձիթապտղի ձեթ
- աղ, աղացած սև պղպեղ
Պատրաստման եղանակը
- Միսը ոչ մեծ կտորներով կտրատեք: Սոխը բարակ օղակների ձևով կտրատեք, սխտորն ու ռեհանը մանրացրեք: Լոլիկների վրա խաչաձև կտրվածք արեք, 30 վրկ մտցրեք տաք ջրի, ապա սառը ջրի մեջ, կեղևը հեռացրեք: Հեռացրեք նաև սերմերն ու հեղուկը: Պտղամիսը մանր կտրատեք:
- Խորը թավայի մեջ տաքացրեք 3 ճ.գ. ձեթը, ավելացրեք միսը և ուժեղ կրակի վրա տապակեք մինչև կարմրելը, 5-7 րոպե: Աղ ու պղպեղ արեք: Միսը տեղադրեք տաք ափսեի մեջ:
- Թավայի մեջ, որտեղ միսն եք տապակել, 5 րոպե տապակեք նաև սոխը մինչև փափկելը: Ավելացրեք լոլիկը, խառնեք, ավելացրեք տաք միսը, ևս 40 րոպե տապակեք: Եթե հեղուկն արագ գոլորշիանա, տաք ջուր ավելացրեք:
- Քանի դեռ միսը շոգեխաշվում է, պատրաստեք աղցանը: Լոլիկների վրա խաչաձև կտրվածք արեք, 30 վրկ մտցրեք տաք, ապա սառը ջրի մեջ, կեղևը, սերմերն ու հեղուկը հեռացրեք: Պտղամիսը կտրատեք: Ծաղկակաղամբի տերևներն ու կոշտ մասերը հեռացրեք: Ծաղկակաղամբը մասնատեք, 5-7 րոպե մտցրեք եռացող աղաջրի մեջ, կիսաեփ արեք:
- Մանր կտրատեք սոխն ու բեկոնը: Բեկոնը տապակեք թավայի մեջ, միջին ուժգնության կրակի վրա, 3-4 րոպե: Ավելացրեք սոխը, տապակեք ևս 5 րոպե: Ծաղկակաղամբը լցրեք սոխով ու բեկոնով թավայի մեջ: Խառնելով 2-3 րոպե տապակեք: Ավելացրեք լոլիկները, աղ ու պղպեղ արեք, ևս 7-8 րոպե տապակեք:
- Հացը ոչ մեծ կտորներով կտրատեք, առանձին թավայի մեջ մնացած ձեթով տապակեք: Մսի մեջ ավելացրեք սխտորն ու ռեհանը, խառնեք, 5 րոպե տապակեք: Ավելացրեք նաև հացի կտորները, ևս 5 րոպե թողեք կրակի վրա:
- Մատուցեք տաք վիճակում, տաք աղցանի հետ միասին:
Խորհուրդ: Որպեսզի աղցանն ավելի գունազարդ լինի, ծաղկակաղամբի կեսը կարող եք փոխարինել բրոկոլիով: Նրանք, ովքեր կծու են սիրում, կարող են աղցանի մեջ մանր կտրտած կծու չիլի պղպեղ ավելացնել: Բացի այդ, այսպես կարող եք պատրաստել ոչ միայն ծաղկակաղամբը, այլև դդումը: Բաղադրատոմսը նույնությամբ կրկնեք՝ ծաղկակաղամբը փոխարինելով 1,5 սմ հաստության դդումի կտորներով: