...

Հեշտ ու համեղ. Նեապոլյան պիցցա

Հեշտ ու համեղ. Նեապոլյան պիցցա

Նեապոլյան պիցցայի հետ կապված բազում լեգենդներ կան: Ընդհանրապես պիցցան շատ հին ուտեստ է: Համարվում է, որ նման մի բան պատրաստել են դեռ էտրուսկները: Իսկ ահա մեզ հայտնի տեսքը այն ստացել է 16-րդ դարում, երբ Եվրոպայում տարածվեց լոլիկը:

Բայց նեապոլյան պիցցայի բաղադրատոմսը վերջնականապես հաստատվել է 19-րդ դարում: Մի անգամ Նեապոլ այցով ժամանում են Իտալիայի արքա Ումբերտո 1-ինն իր կնոջ՝ Մարգարիտայի հետ: Տեղացի խոհարար Ռաֆայել Էսպոզիտոն ու նրա կինը արքայի և թագուհու պատվին երեք պիցցա են պատրաստում, որոնք էլ մատուցում են ընթրիքին: Առաջինը պատրաստված էր տապակած մանր ձկներով ու ձիթապտղի ձեթով, երկրորդը՝ լոլիկով, սխտորով, ռեհանով, խնկածաղիկով և ձիթապտղի ձեթով: Իսկ երրորդը հիշեցնում էր իտալական դրոշը՝ լոլիկներ, մոցարելա, ռեհան: Հայտնի է, որ թագուհուն ամենից շատ դուր է եկել երրորդ պիցցան, որը մինչ օրս այդպես էլ անվանում են՝ պիցցա «Մարգարիտա»: Իսկ երկրորդը շատ հավանել են նեապոլցիները, որոնք էլ պիցցային իրենց անունն են տվել:

Բաղադրիչները
2 մեծ պիցցայի համար

  • 500 գ պատրաստի խմորիչով խմոր (տես՝ խորհուրդը)
  • 400 գ հասած լոլիկ
  • 2 պճեղ սխտոր
  • ռեհանի 8 տերև
  • մի պտղունց խնկածաղիկ (орегано)
  • 5-6 ճ.գ. ձիթապտղի ձեթ
  • աղ

Պատրաստման եղանակը

  1. Խմորը երկու մասի բաժանեք: Դրանք 0,5 սմ հաստությամբ շրջանաձև բացեք և տեղադրեք տապակների մեջ: 10-15 րոպե թողեք տաք տեղում:
  2. Լոլիկների վրա խաչաձև կտրվածք արեք, 30 վրկ մտցրեք եռացրած, ապա սառը ջրի մեջ, կեղևն ու սերմերը հեռացրեք, հեղուկը քամեք: Լոլիկի պտղամիսը բարակ շերտերով կտրատեք:
  3. Մանր կտրատեք ռեհանը: Սխտորը մանր քերիչով անցկացրեք: Կտրտած ռեհանն ու սխտորն ավելացրեք լոլիկներին: Աղ արեք, ավելացրեք խնկածաղիկն ու խառնեք:
  4. Խմորների մակերեսները ձեթով պատեք, վրան լցրեք ստացված խառնուրդը: Պիցցաների վրա լցրեք մնացած ձեթն ու 10-15 րոպեով տեղադրեք 250 աստիճան ցելսիուս տաքության ջեռոցում: Միանգամից մատուցեք:

Խորհուրդ: Խմորիչով խմոր պատրաստելու համար 15-20 գ թարմ խմորիչ, 500 գ ցորենի ալյուր վերցրեք, մի փոքր աղ ու շաքարավազ, 2 ճ.գ. ձիթապտղի ձեթ և 38-40 աստիճան ցելսիուս տաքության բավարար քանակի ջուր, որպեսզի փափուկ ու հարթ խմոր ստացվի: Լավ հունցեք խմորը, ծածկեք այն և մի քանի ժամով թողեք տաք տեղում: Խմորը 6 ժամից շատ թողնել պետք չէ:

«Չորրորդ իշխանություն», թիվ 28, 2020

ՆՄԱՆԱՏԻՊ ՆՅՈՒԹԵՐ
Դեպի ՎԵՐ