Մեծ պահքին նախորդող շաբաթը իտալացիները Բարեկենդանի տոնն են նշում: Երեխաները, երբեմն նաև մեծահասակները Բարեկենդանի տոնի կոստյումներ են հագնում, դպրոցները մի քանի օրով փակվում են, քաղաքներում տոնակատարություններ ու շքերթներ են անցկացնում: Սեղանները լցնում են բազմազան ուտեստներով: Աղանդերներից սովորաբար փքաբլիթներ են լինում, որոնց բաղադրատոմսերը շատ-շատ են: Մենք առաջարկում ենք փորձել Բազիլիկատում պատրաստվող փքաբլիթները:
Բաղադրիչները
4 բաժնի համար
- 250 գ ալյուր
- 1 մեծ կարտոֆիլ
- 12 գ թարմ փխրեցուցիչ
- 250 մլ ձիթապտղի ձեթ
- ջրիկ մեղր
- 1/4 ճ. գ. աղ
Պատրաստման եղանակը
- Կեղևով կարտոֆիլը 30 րոպե եփեք, մաքրեք կեղևից ու պյուրեի վերածեք: Փխրեցուցիչը բացեք 1/2 բաժակ տաք (38-40 աստիճան ցելսիուս) ջրի մեջ: Ալյուրը մաղեք, վրան լցրեք փխրեցուցիչով ջուրը, ավելացրեք կարտոֆիլն ու աղը:
- Խմորը հունցեք՝ անհրաժեշտության դեպքում տաք ջուր ավելացնելով մինչև այն դադարի կպչել ձեռքերին: 2 ժամ թողեք տաք տեղում:
- Խորը թավայի մեջ միջին ուժգնության կրակի վրա տաքացրեք ձեթը: Խոնավ ձեռքերով խմորից ոչ մեծ օղաբլիթներ ձևավորեք:
- Օղաբլիթ-փքաբլիթները ձեթի մեջ տապակեք երկու կողմից մինչև ոսկեգույն դառնալը: Թավայի միջից պատրաստի փքաբլիթները տեղափոխեք անձեռոցիկների վրա, մեկ անգամ շրջեք ու տեղավորեք տաքացրած ափսեի մեջ:
Պատրաստի փքաբլիթների վրա ըստ ճաշակի մեղր լցրեք ու միանգամից մատուցեք:
«Չորրորդ իշխանություն», թիվ 2, 2021